ကလေးလေးကို ကားအက်ဆီးဒန့်ဖြစ်တဲ့ လယ်ကွင်းကို ခေါ်သွားလို့ ရှုခင်းပြနေတာ မဟုတ်ပါဘူး။ ကားအက်ဆီးဒန့်ထဲကနေ တစ်ဦးတည်းသော ဒဏ်ရာမရ၊ အသက်မသေ ကျန်ခဲ့တဲ့ ကလေးငယ်လေးကို ကယ်ဆယ်ရေး ရဲ့ ပွေ့ချီလို့ အာရုံပြောင်း ချော့သိပ်နေပုံသာ ဖြစ်ပါတယ်။

ပြီးခဲ့တဲ့ ရက်ပိုင်းက အမေရိကန်ပြည်ထောင်စု၊ ကိုလိုရာဒို ပြည်နယ်က လမ်းမကြီး တစ်ခုမှာ အက်ဆီးဒန့် ဖြစ်ပါတယ်။ SUV မိသားစုကားကို ဖခင်ဖြစ်သူ မောင်းနှင်လာပြီး အကွေ့မှာ အရှိန်မထိန်းနိုင်ပဲ လယ်ကွင်းထဲသို့ လိမ့်လို့ ထိုးကျသွားပါတယ်။ ဝမ်းနည်းစရာကတော့ ကားထဲမှာ ဘယ်သူမှ ထိုင်ခုံ ကားပတ် ပတ်မထားပါဘူး။ ဖခင်ဖြစ်သူ ပွဲချင်းပြီး သေပါတယ်။ မိခင်ဖြစ်သူနဲ့ သားသမီး ၃ ဦးမှာ မိခင်နဲ့ သားသမီး နှစ်ဦးက အရေးပေါ်ခန်းသို့ ဟက်စကီးနဲ့ သယ်ဆောင် ပေးခဲ့ရပြီး စကားအနည်းငယ်သာ ပြောတတ်ရှာသေးတဲ့ ကလေးငယ် တစ်ဦးကတော့ ဘာ ဒဏ်ရာမှ သိပ်မရပဲ ကျန်ခဲ့ပါတယ်။

ဒါပေမယ့် ကလေးငယ်လေးရဲ့ မျက်လုံးမှာရော၊ စိတ်ထဲမှာရော အကြောက်တရားတွေ လွမ်းမိုးလျက် ရှိပါတယ်။ ကယ်ဆယ်ရေး တပ်ဖွဲ့ ရောက်လာပြီး ရဲတစ်ဦးမှ ကလေးငယ်ကို ကားထဲကနေ ပွေ့ချီထုတ်ပါတယ်။ ကလေးငယ်လေး အငိုတိတ်အောင်ချော့ပါတယ်။ ပြီးတော့ ကလေးငယ်ရဲ့ အကြည့်ကို ကားဘက်မှာ ရှိမနေတော့အောင် အခြားသော တိမ်တိုက်နဲ့ လယ်ကွင်းများကို လက်ညိုး ထိုးပြလို့ ချော့သိပ်ပေးခဲ့ပါတယ်။

ကလေးငယ်လေး အသက်ရှင်ကျန်အောင်လည်း မိခင်မှ ကြိုးစား ကာကွယ်ပေးခဲ့ပုံ ရပါတယ်။ မိခင်နဲ့ ကျန် ကလေး ၂ ဦးကတော့ အသက်ရှင်မလား၊ သေမလား သေချာ မသိသေးပါဘူး။ လယ်ကွင်းမှာ ကလေးကိုချီလို့ လက်ညိုးထိုးပြနေတဲ့ ဓာတ်ပုံလေးကတော့ အင်တာနက်မှာ ဝမ်းနည်းစဖွယ်ဖြစ်သကြောင့် နာမည်ကြီးခဲ့ပါတယ်။

အောင်ခမ်း (ရိုးရာလေး)