Mickey Mouse

မိုမိုလေးပရိသတ်ကြီးရေ ငယ်ငယ်တုန်းက ကာတွန်းတွေအများကြီးကြည်ခဲ့ဖူးပါသလားခင်ဗျာ။ ဒါဆို သင်ငယ်ငယ်လေးတုန်းက အကြိုက်ခဲ့ဆုံး ကာတွန်းဇာတ်ကောင်ကရော ဘယ်သူဖြစ်မလဲ။ ကျွန်တော်ခန့်မှန်းကြည့်ရမယ်ဆိုရင် Mickey Mouse ပါလောက်မယ်လို့ ထင်ပါတယ်။

ဒါဆို သင်က Mickey Mouse ဇာတ်ကားအများကြီးကို ကြည့်ရှုဖူးခဲ့သူတစ်ယောက်ဆိုရင် ကျွန်တော်တစ်ခုလောက်မေးချင်ပါတယ်။ Mickey Mouse က ဇာတ်ကားတိုင်းလိုလိုမှာ လက်အိတ်အဖြူရောင်လေးကို ဘာကြောင့်အမြဲဝတ်ဆင်တာပါလဲ။ ဖြေရခက်သွားပြီလို့ထင်ပါတယ်။ ဒီမေးခွန်းကို Mickey Mouse Fan တွေတောင် လုံးဝမသိနိုင်ပါဘူး။ ဒီလို လက်အိတ်အဖြူရောင်လေး ဝတ်ဆင်ပေးထားရတာအကြောင်းသုံးချက်ရှိပါတယ်။ ဒါလေးကို ဖော်ပြပေးသွားပါမယ်။
( ၁ ) ပထမဆုံးအချက်ကတော့ Animator များအနေနဲ့ ကာတွန်းဒီဇိုင်းရေးဆွဲတဲ့အခါမှာ အချိန်ကုန်သက်သာစေဖို့ပဲဖြစ်ပါတယ်။ Mickey Mouse ရဲ့ပုံစံကို တစ်ချက်ကြည့်ကြည့်လိုက်ပါ။ တခြားကာတွန်းဇာတ်ကောင်တွေလို ခန္ဓာကိုယ်အစိတ်အပိုင်းတွေ အနုစိတ်ဆွဲထားတာမဟုတ်မှန်း သတိထားမိသွားပါလိမ့်မယ်။ Animator တွေက Mickey Mouse လက်ချောင်းတွေကို အချိန်ကုန်ခံမဆွဲချင်လို့ လက်အိတ်နဲ့အစားထိုးတာပဲ ဖြစ်ပါတယ်။

( ၂ ) Mickey Mouse ကို စတင်အသက်သွင်းခဲ့ခေတ်တုန်းက အဖြူအမည်းခေတ်ဖြစ်ပါတယ်။ အဖြူအမည်းနဲ့ပြနေတဲ့အချိန်မှာ Mickey Mouse လက်ကလည်း အမည်းရောင်ဆိုတော့ ကြည့်ရှုသူစိတ်မှာ ဇဝေဇဝါဖြစ်သွားနိုင်ပါတယ်။ ဒါကြောင့်မို့ လက်အိတ်အဖြူရောင်လေးကို ထည့်သွင်းရေးဆွဲလိုက်တာပဲဖြစ်ပါတယ်။

( ၃ ) နောက်ဆုံးတစ်ချက်ကတော့ Mickey Mouse ကိုဖန်တီးခဲ့သူ Walt Disney ရဲ့ စိတ်ကူးပဲဖြစ်ပါတယ်။ Walt က Mickey Mouse ကို တိရစ္ဆာန်တစ်ကောင်လို့ မသတ်မှတ်စေချင်ပဲ လူတစ်ယောက်လို့သာ မြင်စေချင်တာကြောင့် လူ့အသုံးဆောင်ဖြစ်တဲ့ လက်အိတ်ကို ထည့်သွင်းရေးဆွဲခဲ့တာပဲဖြစ်ပါတယ်ခင်ဗျာ။

Credit: MOMOLAY