ဝါဖျော့ဖျော့ အရောင်ရှိတဲ့ လူကြီးဝတ်တီရှပ်ကို ဝတ်ဆင်ထားတဲ့ အသက်ခုနစ်နှစ်အရွယ် ကလေးငယ်တစ်ဦးအဖို့ တီရှပ်အင်္ကျီက ပခုံးဘေးအတွဲသားကျနေတယ်။
လက်တစ်ဖက်က ပလုံထည့်တဲ့ ဂုန်နီအိတ်ကိုဆွဲ၊ ကျန်တစ်ဖက်က ကွမ်းယာဆေးဘူးကို နှာခေါင်းဝတေ့ပြီး ရထားဘူတာသံလမ်းဘေးမှာ ရပ် နေပါတယ်။

မျက်တွင်းအချောင်သားဖြစ်နေတဲ့ အဲသည်ကောင်လေးဟာ ရထား လာရာ သံလမ်းဘက်ကို ငေးရင်း လက်ထဲမှာကိုင်ထားတဲ့ ကွမ်းယာဆေးဘူးကိုသာ တရစပ်ရှူရှိုက်နေတယ်။
သူ့ကျောပြင်နဲ့ ခြေလက်တွေမှာ ကော်တွေ ပေပွနေတယ်။ မျက်နှာ၊ ဒူးခေါင်းနဲ့ ပေါင်တွေမှာလည်း ကြေးကွက်တွေ အကွက်လိုက်အကွက်လိုက် ထနေတယ်။
သူကိုင်ထားတဲ့ ကွမ်းစားဆေးဘူး ထဲမှာတော့ ပရိဘောဂပစ္စည်းတွေမှာ ဖာထေးအသုံးပြုတဲ့ တီဗီကော် ဖြစ်ပါ တယ်။

သူတို့နဲ့ သက်တူရွယ်တူ ကလေးငယ် ၂၀ ကျော်လောက်ဟာ မြောက်ဥက္ကလာတံတားလေးဘူတာအနီးမှာ အုပ်စုဖွဲ့နေထိုင်ကြတယ်။ အဲသည်နား မှာနေပြီး ပလုံကောက်တဲ့အလုပ်ကို လုပ်ကြတယ်။ သူတို့တွေဟာ မူးယစ်စေတဲ့ ပစ္စည်းမျိုးစုံကို အသက်မပြည့် သေးဘဲ ကျွမ်းကျွမ်းကျင်ကျင် ထိတွေ့သုံးစွဲနေကြပါပြီ။

နာမည်က မောင်ချစ်ခိုင်

‘သားအစ်ကိုကို စောင့်နေတာ၊ ခဏနေရင် သူလာတော့မှာ၊ ပြီးရင် သားတို့လိုက်ကောက်တော့မှာ˘လို့ ခုနစ်နှစ်သားအရွယ် မောင်ချစ်ခိုင်က ပြောတယ်။
မောင်ချစ်ခိုင်(အမည်လွှဲ)မှာ မွေး ချင်း ခြောက်ယောက် ရှိတယ်။ မောင်ချစ်ခိုင်က အလတ်ပါ။ ဝမ်းတစ်နပ် ပြည့်ဖို့ နေ့စဉ်  ခြေလှမ်းပေါင်းများစွာ အသုံးချနေရတဲ့ ကလေးငယ်တစ်ဦး ဖြစ်ပါတယ်။
မိသားစုရှိပေမဲ့ မောင်ချစ်ခိုင်ရဲ့ အဖေနဲ့အမေက ပင်လယ်ထွက်အလုပ်လုပ်ကိုင်နေကြတာပါ။ မောင်ချစ် ခိုင်တို့ကတော့ အဒေါ်နဲ့ နေထိုင်ကြပါ တယ်။ ဒါပေမဲ့ မောင်ချစ်ခိုင်က ကော် ရှူတဲ့အကျင့်ကြောင့် အိမ်မှာနေလို့မရတော့ပါဘူး။

ကော်ရှူဖြစ်ခဲ့ပုံ

‘သားအစ်ကိုက သားနှာခေါင်းကို ကော်တွေနဲ့ လာသုတ်တယ်၊ ပြီးကျတော့ ဘူးကို လက်နဲ့အုပ်ပြီး ရှူခိုင်းတယ်၊ ပထမတော့သားလဲ မရှူတတ်ဘူး၊ မူးသွားတယ်၊ နောက်ကျမှ ရှူ တတ်သွားတယ်၊ သားကော်ရှူတာ သိပ်မကြာသေးဘူး˘လို့ ကော်ကြေးတွေ ပရပွနဲ့ မည်းညစ်နေတဲ့လက်ထဲက ကော်ဘူးကို ကိုင်ထားပြီး ဒူး ထောင်လျက်သားနဲ့ ပြောတယ်။

အဲသည်ကော်ရဲ့ အရောင်က အဝါရောင်ပါ။ စူးဝါးဝါး အနံ့အသက် ရှိ တယ်။တစ်ကြိမ်ရှူလိုက်ရုံနဲ့ ခေါင်းထဲ မူးနောက်သွားစေတတ်ပါတယ်။
ဒါပေမဲ့ သည်အနံ့ကို စွဲနေတဲ့ ကလေးငယ်တွေအတွက်တော့ ဒါက  အလွန်ကိုကောင်းတဲ့ ခံစားချက်ဖြစ်စေပြီး သူတို့အလွန်ကြိုက်တဲ့အနံ့ဖြစ်တယ်လို့ ဆိုပါတယ်။
မောင်ချစ်ခိုင်က“အဲဒါကိုရှူနေရင် စိတ်ထဲမှာ မှန်းချင်တာ မှန်းလို့ရတယ်၊ feel ပဲ တွေးချင်တာ တွေးလို့ရတယ်၊ အိပ်မပျော်ဘဲ မူးနေတာမိုက်တယ်” လို့ ပြောပြပါတယ်။

ဘယ်လို ဝယ်ကြလဲ

ပခုံးဘေး တွဲလျားကျနေတဲ့ အင်္ကျီလည်ပင်းအစပ်မှာ ကော်ဘူးကိုဝှက်ပြီး လက်ထဲမှာ ကျစ်ကျစ်ပါအောင် ဆုပ် ထားတဲ့ ကျပ် ၅၀ဝ တန် နှစ်ရွက်နဲ့ အနားမှာရှိတဲ့ အိမ်ဆောက်ပစ္စည်းဆိုင်ကို ဝင်သွားပါတယ်။ မိနစ်အနည်းငယ် ကြာတဲ့အခါမှာတော့ သူ့အလိုရှိတဲ့ ကော်ဘူးကို ချောချောမွေ့မွေ့ရလာပါတယ်။

မောင်ချစ်ခိုင်က “သားသူငယ် ချင်းတွေက သားကော်ဘူးလာလာ လုကြတယ်၊ အဲဒီကျရင် သားအစ်ကိုနဲ့ ရန်ဖြစ်ရတယ်၊ လက်နှစ်ဖက်ကိုအုပ် ပြီး ရှူရတာ၊ တစ်ဖက်တည်းဆိုရင် ကော်ကအငွေ့ပြန်သွားရော၊ ဘူးအသေးဆိုရင် သားတစ်နေကုန်ရှူလို့ရတယ်”လို့ သူဝယ်လာတဲ့ တီဗီကော် ဘူးကို မြှောက်ပြရင်း ပြောပါတယ်။

ဒါ့အပြင် လေသလပ်ပြီး ခမ်းလု လုဖြစ်နေတဲ့ ကော်အကျန်ကို ပါးစပ်ထဲ ကတံတွေးနဲ့ လက်နဲ့စွပ်ပြီး မွှေတာကလည်း ကော်အနံ့မပျောက်သွားအောင်လို့ သူကပြောပါသေးတယ်။ မောင်ချစ်ခိုင်ရဲ့ တစ်နေ့တာ ဝင်ငွေက ကျပ် ၅၀ဝ၀ နဲ့ ၈၀ဝ၀ ကြားမှာ ရှိတယ်။

အဲသည်ကော်ဟာ နှစ်လက်မသာသာ တစ်ဘူးကို ကျပ် ၈၀ဝ နဲ့ ရောင်းချ နေပြီး ငါးလက်မအရွယ်ခန့်ဘူးကို တော့ ကျပ် ၁၆၀ဝ နဲ့ ရောင်းချပါတယ်။
အဲသည်လိုကော်ဘူးတွေကို စတိုးဆိုင်၊  အိမ်ဆောက်ပစ္စည်း အရောင်း ဆိုင်နဲ့ လျှပ်စစ်ပစ္စည်းအရောင်းဆိုင်တွေမှာ ဝယ်လို့ရတယ်။ ရပ်ကွက်ထဲမှာရှိတဲ့  ကွမ်းယာဆိုင်အချို့မှာလည်း အလွယ်တကူပဲ ရောင်းပေးကြတယ်။
ဒါ့အပြင် အဲသည်ကလေးအများစုဟာ ရပ်ကွက်တည်းမှာရှိတဲ့ ဆေးဆိုင်တွေက ရောင်းချတဲ့ ခေတ္တမိန်းမောမှုကို ဖြစ်စေတဲ့ အကိုက်အခဲပျောက် ဆေးတွေ၊ ချောင်းဆိုးပျောက်ဆေး တွေကိုလည်း တစ်နေ့ကို  ခြောက် လုံးထက် မနည်းသောက်သုံးနေကြပါတယ်။

အသက် ၁၉ နှစ်အရွယ် မောင်ရန်နိုင်စိုး (အမည်လွှဲ) က ‘ကျွန်တော်တို့ သွားဝယ်ရင်တော့ ချောင်းဆိုးပျောက်ဆေးလို့ပဲ ပြောပြီး ဝယ်လိုက်တာ၊ ကလေးတွေဆိုရင် ဆေးဆိုင်က မရောင်းဘူး၊ ကျွန်တော်တို့ကိုပဲ ရောင်း တာ၊ အဲဒီဆေးကသောက်ပြီး နာရီဝက် တစ်နာရီဆိုရင် အရှိန်တက်လာတယ်၊ ရင်တွေတုန်လာတယ်၊ တွေးချင်တာ တွေးနေလို့ရတယ်၊ စိတ်ထဲမှာ ထိုးချင် တဲ့စိတ်တွေ ပေါက်လာတယ်၊ ကျွန်တော်တို့က ရန်ဖြစ်ခါနီး ကျွန်တော်တို့ ကြည့်မရတဲ့ အကောင်တွေနဲ့ တွေ့ခါနီး ဆို အဲဒီဆေးသောက်တယ်”လို့ ပြောပါတယ်။

နောက်သူတို့ သုံးစွဲနေတဲ့ ဆေးတစ်မျိုးကတော့ ဆေးပြင်းလိပ်လို့ခေါ်တဲ့ အထဲမှာ မူးယစ်ဆေးဓာတ်ပါဝင်တဲ့ ဆေးလိပ်အမျိုးအစား ဖြစ်ပါတယ်။
အဲသည်ဆေးလိပ်တွေကို ရပ်ကွက်ထဲမှာရှိတဲ့ စူပါမားကက်အချို့မှာ အလွယ်တကူ ရရှိနိုင်တယ်။ အဲသည်ဆေးလိပ်တွေကို အသက်မပြည့်သေးတဲ့ ကလေးငယ်တွေ ဝယ်ယူရင်လည်း အလွယ်တကူ ရောင်းချနေတာ တွေ့ရပါတယ်။ မူးယစ်ဆေးမျိုးစုံသုံးစွဲနေတဲ့ မောင်ချစ်ခိုင်ဟာ ပြောတဲ့ စကားတွေမှာ ပုံမှန်ကလေးငယ်တစ် ယောက်အတိုင်း ရှိနေတယ်ဆိုပေမဲ့ တစ်ခါတစ်ရံမှာ ကယောင်ချောက်ချား ဖြစ်ပြီး ပြောသမျှစကားတွေဟာ သောင်စဉ်ရမရ ဖြစ်နေပါတယ်။

ဘာဖြစ်သလဲ

ကော်ရှူတဲ့ကလေးအများစုက လည်း လူငယ်ထိန်းသိမ်းရေးစခန်း တစ်နည်းအားဖြင့် ကလေးထောင်ကို အနည်းဆုံး နှစ်ခေါက်ခန့်ရောက်ဖူးကြသူတွေ ဖြစ်ပါတယ်။
‘သားက နှစ်ခါရောက်ဖူးတယ်၊ သား ဖုန်းသုံးလုံးခိုးလိုက်တုန်းက အဲဒီတုန်းက ရဲတွေအိမ်ကိုလာပြီး သားကို ခေါ်သွားတာ၊ ကားပေါ်မှာ ရဲတွေနဲ့အတူ သားလိုက်သွားတာ၊ ကားပေါ် ရောက်တော့ သူတို့က မေးတယ်၊ သူတို့လက်ထဲမှာ ကိုင်ထားတဲ့သေနတ် ကိုပြပြီး မင်းအဲဒါဘာလဲသိလား၊ သား က ပြန်ဖြေလိုက်တယ်၊ သေနတ်လို့၊ ဒါပေမဲ့ အခု သားဖုန်းမခိုးတော့ဘူး၊ ပလုံပဲ လိုက်ကောက်တော့တာ” လို့ မောင်ချစ်ခိုင်တစ်ယောက် သူတွေ့ကြုံ ခဲ့ရတဲ့ အဖြစ်အပျက်ကို ပြောပြရင်း ပဆစ်တုတ်ကလေးထိုင်ရင်း ခေါင်းငုံ့ ရယ်နေပါတယ်။

အဲသည်လိုခိုးယူပြီးတဲ့ဟန်းဆက်၊ ဖုန်းစတဲ့ ပစ္စည်းတွေကိုတော့ ကလေးတွေက ဆိုင်ကယ်ကယ်ရီမောင်းနှင်တဲ့ သူတွေဆီမှာ တစ်ဝက်ဈေးနဲ့ ပြန် လည်ရောင်းချကြတယ်လို့ သိရပါ တယ်။
‘သားမှတ်မိတာ ငယ်ငယ်တုန်းကပဲ သားကို ကိုဖြိုးကခိုးခိုင်းတာ၊ သားက မခိုးတတ်ဘူး၊ သူက သင်ပေးတယ်၊ သားတို့က ဆေးရုံတွေမှာ၊ ကားဝင်းတွေမှာ အိပ်ပျော်နေတဲ့ လူတွေဆီကနေ သူတို့ဘေးမှာချထားတဲ့ ဖုန်းတွေကိုခိုးရတာ”လို့ သူက ဆက်ပြောပြပါတယ်။

မောင်ချစ်ခိုင်လိုပဲ ကော်ရှူတဲ့ ကလေးအများစုက ခိုးမှု၊ လုယက်မှုနဲ့ ခိုက်ရန်ဖြစ်ပွားမှုတွေကို ကျူးလွန်နေကြတာတွေကြောင့် လူငယ်ထိန်းသိမ်း ရေးကျောင်းကို မကြာခဏရောက်လေ့ ရှိပါတယ်။ ဒါပေမဲ့ သူတို့ရဲ့ နီးစပ်ရာ ဆွေမျိုးသားချင်းတွေက ထောက်ခံစာနဲ့ လာရောက်ထုတ်ပေးပြီး သည်ကလေးတွေက အပြင်ကိုပြန်ရောက်ပါတယ်။ သည်လိုအပြစ်တွေကို ထပ် ကာထပ်ကာ ကျူးလွန်နေကြရတာ ဖြစ်ပါတယ်။
အဲသည်ကော်ကို အသက်ငါးနှစ် ကစပြီး အသက်ကြီးပိုင်းတွေအထိပါ သုံးစွဲနေကြတာဖြစ်ပါတယ်။ လက်ရှိ အခြေအနေမှာ ကော်ရှူသူတွေက အမျိုးသမီး၊ ကလေးငယ်နဲ့ လူငယ်အချို့မှာ အများဆုံးဖြစ်နေတာ တွေ့ရပါတယ်။

ရန်ကုန်မြို့ရဲ့ရထားသံလမ်းဘေး ဘူတာတွေရဲ့ခရီးသည်စောင့် ခုံတန်းလျားတွေမှာ ကလေးငယ်ပွေ့ချီနေရင်း ကော်အသုံးပြု နေတဲ့ကလေးမိခင်တွေ၊ အရွယ် မရောက်သေးတဲ့ကလေးငယ်တွေနဲ့ လူငယ်အများစုက အဲသည် ကော်ကို မူးယစ်ဆေးသုံးသလို တစ်သီးတစ်သန့် အသုံးပြုနေကြတာပါ။

ဆိုင်ကယ် ကယ်ရီဆွဲတဲ့ အသက် ၁၉ နှစ်အရွယ် မောင်ရန်နိုင်စိုး (အမည် လွှဲ) က ‘ကျွန်တော် ရဲစခန်းတော့ ရောက်ဖူးတယ်၊ ပြီး တော့ နောက်မရှူ ဖို့ သတိပေးတယ်၊ ဒါပေမဲ့  အားချင်းပဲ ပြန် လွှတ်ပေးပါတယ်၊ ကျွန်တော်တို့ က ကော်ပဲရှူတာလေ၊ သူများပစ္စည်းခိုးတာမှ မဟုတ်တာ၊ ဘူတာနားမှာ တော့ မိန်းမတွေလဲရှူတယ်၊ ကလေးတွေရောပဲ သူခိုးလေးတွေ၊ ကော်ရှူလို့ ဖမ်းတာတော့ ရှိတယ်၊ ဒါပေမဲ့ ထောင်မချဘူး၊ တကယ်လို့ ကော်ရှူ လို့ ထောင်ချမယ်၊ ဥပဒေတစ်ခုခု ရှိ မယ်ဆိုရင်တော့ မရှူတော့ဘူးပေါ့”လို့ ပြောပါတယ်။

ဘယ်ကို ခရီးနှင်

ရေသန့်ဘူးကောက်တဲ့ ကလေးအများစုက နံနက်မိုးလင်းတာနဲ့ သူများထက်စောနိုင်သမျှ   အစောဆုံးထွက်ကြပါတယ်။ မောင်ချစ်ခိုင်တို့ ညီ အစ်ကိုတွေကတော့ နံနက် ၅းဝ၀ နာ ရီလောက် ဆိုရင် ဂုန်နီအိတ်လွယ်ရင်း သူတို့ ခရီးကို စတင်ကြပါတော့တယ်။

‘သားတို့ထောက်ကြန့်အထိ ကားစီးတယ်၊ ထောက်ကြန့်ရောက်တော့ ပိုက်ဆံလိုက်တောင်းတယ်၊ ပြီးတော့ တိုက်ကြီး၊ မှော်ဘီဘက် ကိုသွားတယ်၊ တစ်ခါတလေလဲ ကားစီးပြီး ပြန်လာတယ်၊ ညဉ်နက် သွားရင်လဲ ပြန်မလာတော့ဘူး၊ အဲဒီဘက်မှာပဲ အိပ်လိုက်တယ်၊ ရဲတွေက လှည့်နေတာ၊ သူတို့ မတွေ့ အောင် ပုန်းနေရတယ်”လို့မောင် ချစ်ခိုင်က သူတို့ရဲ့သက်မွေးကျောင်းအတွက် သွားရတဲ့ ခရီးစဉ်ကို ရှင်းပြပါတယ်။
မောင်ချစ်ခိုင်တို့လို ပြန်စရာ အိမ်မ ရှိတဲ့ ကလေးငယ်တွေအတွက်တော့ သူတို့ရဲ့အိမ်က ရထားလမ်းဘေး၊ မှတ်တိုင်၊ ခုံတန်းလျား၊ ရပ်ကွက်ဈေးက အမှိုက်တွန်းလှည်းနဲ့ ဆာလာ အိတ်တွေကသာ သူတို့အဖို့ အနွေးဆုံးဖြစ်တယ်လို့ ဆိုပါတယ်။

‘ဒီအိတ်တွေက နွေးတယ်၊ ခြင်လဲသိပ်မကိုက်ဘူး၊ အခုလို မိုးရွာရင်တော့ သစ်ပင်ကြီးတွေ အောက်မှာနေတယ်၊ ဘူတာအမိုး အောက်တွေမှာနေတယ်၊ ရဲမတွေ့ အောင်တော့နေတယ်၊ ရဲတွေ့ရင် နားရင်းအုပ်ခံရတယ်၊ နံပါတ် တစ် တုတ်နဲ့ အရိုက်ခံရတယ်˘လို့ သူက ပြောပါတယ်။

ဘယ်သူတွေ သုံးကြလဲ

ကော်သုံးစွဲသူအများစုက အိမ် ခြေရာမဲ့တွေ၊ မိဘမရှိတော့တဲ့ ကလေးငယ်တွေအပြင် စိတ်ခံစားမှုအပြင်း ထန်ဆုံးဖြစ်တဲ့ ဆယ်ကျော်သက်လူငယ်တွေက အများဆုံးဖြစ်ပါတယ်။ သူတို့က ကော်ဘူးကို အင်္ကျီ ဒါမှမ ဟုတ် ဘောင်းဘီအိတ်များထဲကို ဝှက်ထည့်ထားတယ်။ လူကွယ်ရာမှာဝှက်ပြီး သုံးစွဲကြပါတယ်။

သုံးစွဲတဲ့အခါ ငါးယောက် တစ်အုပ်စု၊ လေးယောက်တစ်အုပ်စုစတဲ့ အုပ်စုများဖွဲ့ပြီး သုံးစွဲကြတာလည်း ဖြစ်ပါတယ်။ သည်လိုသုံးစွဲကြသူတွေက ပတ်ဝန်းကျင်ရဲ့ တိုင်ကြားမှုကို အမြဲလိုလို ခံကြရပြီး သူတို့ကို ကော်ရှူလူတန်းစားလို့ သတ်မှတ်ခေါ်ဝေါ်ကြပါတယ်။

‘သားတို့က ကော်ရှူတော့ တခြားလူတွေ သားတို့နဲ့မဆော့ဘူး၊ ခဏ ခဏ ရန်ဖြစ်တယ်၊ သားကလေးထိန်း ကျောင်းမှာတော့ နေချင်တယ်၊ ကလေးထောင်မှာတော့ မနေချင်ဘူး၊  အဲဒီမှာက ရိုက်လဲရိုက်တယ်၊ အပြင်လဲ မထွက်ရဘူး၊ မုန့်လဲဝယ်စားလို့ မရဘူး၊ ဒါပေမဲ့ လက်ဝှေ့တော့ သင်ပေး တယ်၊ လက်ဝှေ့သင်ပေးတဲ့ ကလေး ထိန်းကျောင်းမှာ နေချင်တယ်” လို့ မောင်ချစ်ခိုင်က သူဖြစ်ချင်တဲ့ဆန္ဒကို ပြောပြပါတယ်။
မောင်ချစ်ခိုင်လိုပဲ မိမိရဲ့ဝမ်းတစ်ထွာပြည့်မီဖို့ ကိုယ့်ခြေထောက်ပေါ် ကိုယ် ရပ်တည်နေရတဲ့ လေလွင့်ကလေးငယ်တွေ အများအပြားရှိနေပါတယ်။ သူတို့က တစ်နေရာ တစ်ဒေသမှာပဲ နေထိုင်ကြတာမဟုတ်ဘဲ ဘဝ ပေးအခြေအနေအရ သင့်သလို လှည့်လည်နေထိုင်နေကြရတာ ဖြစ်တယ်။

မောင်ချစ်ခိုင်က “သားအိမ်မပြန် တာကြာပြီ၊ ညဘက်တွေ သွားတာလဲ သိတယ်၊အမေကြီး လိုက်မရှာဘူး၊ သားအိမ်မှာနေတုန်းက အဖေကြီးနဲ့ အမေကြီး ခဏခဏရန်ဖြစ်တယ်၊ ရန်ဖြစ်ရင် အဖေကြီးက အမြဲတမ်းရိုက်တယ်၊ သားတို့ကိုရောပဲ၊ သားတို့ ညီအစ်ကိုတွေ အိမ်မပြန်ကြဘူး၊ အဖေကြီးနဲ့ အမေကြီးလဲ အိမ်ပြန်မရောက် သေးဘူး”လို့ ပြောပါတယ်။

Author ဝင်းနန္ဒာ

Credit: Kumudra