အမျိုးဘာသာ၊ သာသနာစောင့်ရှောက် ရေးအဖွဲ့(မဘသ)အနေဖြင့် ဆိုင်းဘုတ် ဖြုတ်ဖို့နေနေသာသာ အကြမ်းဖက်ဖြိုခွင်းလာလျှင် အသေခံပြီး ကာကွယ်သွားမည်ဟု ဆရာတော် ဦးဝီရသူက ဇူလိုင် လ ၂၄ ရက်နေ့ညက လူမှုကွန်ယက်မှတစ်ဆင့် မိန့်ကြားသည်။

မဘသ ဆိုင်းဘုတ်များကို အတင်းဖြုတ်ချလျှင် လူမျိုးရေး၊ ဘာသာရေးပဋိပက္ခများ ဖြစ်မည်ကို မလိုလားသည့်အတွက် ကာယကံရှင်များ ကိုယ်တိုင်ဖြုတ်ပေးရန် ညှိနှိုင်းသွားမည်ဟု ယနေ့၊ ဇူလိုင်လ ၂၄ ရက်က ကျင်းပသည့် အမျိုးသား လွှတ်တော်အစည်းအဝေးအပြီး သာသနာရေးနှင့် ယဉ်ကျေးမှု ၀န်ကြီး သူရဦးအောင်ကို ၏ ပြောကြားချက်ကို ပြန်လည်တုံ့ပြန်ခြင်း ဖြစ်သည်။

ထို့ပြင် မြန်မာနိုင်ငံ တွင် ၁၉၈၀ ပြည့်နှစ်က ကျင်းပသည့် ဂိုဏ်းပေါင်းစုံသံဃညီလာခံ က ချမှတ်ထားသည့် ရွှေကျင်၊ မိုးကုတ်၊ လယ်တီ အစရှိသော ဂိုဏ်းကြီးကိုးဂိုဏ်းကိုသာ သံဃာ့အဖွဲ့အစည်းအဖြစ် တရားဝင် သတ်မှတ်ထားခြင်းဖြစ်သည်ဟု သာသနာရေးဝန်ကြီး ၏ ပြောကြားချက်ကိုလည်း ဆရာတော် ဦးဝီရသူက  “မိုးကုတ်တို့၊ လယ်တီတို့ဆိုတာ ဂိုဏ်းမဟုတ်ဘူး။ ဝိပဿနာအဖွဲ့၊ ဝိပဿနာရိပ်သာတွေပါ။ အဲဒီလိုပဲ မဘသတို့ ၉၆၉ တို့ မျိုးချစ်ရဟန်းတော် များတို့ဆိုတာ စင်ပြိုင်သံဃာ့ဂိုဏ်းမဟုတ်ဘူး။ ဂိုဏ်းကြီး ကိုးဂိုဏ်းထဲမှ စိတ်ထားတူရာသံဃာတော်တွေနဲ့ မျိုးချစ်ပြည်သူ တွေ စုပေါင်းထားတဲ့အမျိုးသားရေး အဖွဲ့ အစည်း ဘာသာရေးအဖွဲ့အစည်း သာသနာရေး အဖွဲ့အစည်း သာဖြစ်ပါတယ် ” ဟု ပြန်လည် တုံ့ပြန်ခဲ့သည်။

တစ်နိုင်ငံလုံးက မဘသဆိုင်းဘုတ်များကို ဇူလိုင်လ ၁၅ ရက်နောက်ဆုံးထား၍ ဖြုတ်ချရန် မဟနမှ ကြေညာထားသော်လည်း မန္တလေးနှင့် ဘားအံမြို့တို့တွင်ယနေ့အထိ ဖြုတ်ချမှုမရှိသေးပေ။

ဆရာတော် ဦးဝီရသူ က မဘသ ဆိုင်းဘုတ် များဖြုတ်ချရန်ကြေညာချက်အပေါ် “မဘသ ကတော့ ကိုယ့်ဆိုင်းဘုတ်ကိုယ် ဖြုတ်ဖို့နေနေသာသာ အကြမ်းဖက်ဖြိုခွင်း လာရင်တောင် အသေခံပြီး ကာကွယ် သွားမဲ့အဖွဲ့ဆိုတာ မှတ်ထားလိုက်ပါ ” ဟု လူမှုကွန်ယက်မှတစ်ဆင့် မိန့်ကြားခဲ့ သည်။

Credit : mizimma