အထက်တန်း ရှေ့နေ လုပ်သက် သုံးနှစ်အထိ လုပ်ကိုင်ဆောင်ရွက်ပြီးပါက တရားလွှတ်တော် ရှေ့နေအဖြစ် လျှောက်ထားနိုင်ကြောင်း ပြည်ထောင်စု တရားလွှတ်တော် ချုပ် တရားသူကြီး ဦးမြင့်အောင် က ပြောကြားသည်။

ဇူလိုင် ၃၁ ရက်က ကျင်းပသော ပြည်သူ့ လွှတ်တော် တွင် ပုဇွန်တောင် မဲဆန္ဒနယ် မှ ဦးမြင့်လွင် က အထက်တန်းရှေ့နေ၊ တရားလွှတ်တော် ရှေ့နေ စာမေးပွဲ များ ကျင်းပပေးရန် အစီအစဉ်ရှိ၊ မရှိ မေးမြန်းခဲ့ခြင်း ဖြစ်ပြီး ၎င်းက အထက်ပါအတိုင်း ပြောကြားခဲ့ခြင်း ဖြစ်သည်။

တက္ကသိုလ် မှ ဥပဒေ ဘွဲ့ ရပြီးပါက ရှေ့နေ ဝင်ခွင့် နည်းဥပဒေ များနှင့်အညီ တရားလွှတ်တော် ရှေ့နေ အဖြစ် တစ်နှစ်သင်ကြားပြီး အထက်တန် ရှေ့နေ အဖြစ် စာရင်းတင်သွင်းပေးရန် လျှောက်ထားနိုင်ကြောင်း၊ ယင်းမှတစ်ဆင့် အထက်တန်း ရှေ့နေ အဖြစ် ၃ နှစ် လိုက်ပါဆောင်ရွက်ပြီးပါက တရားလွှတ်တော် ရှေ့နေ များအဖြစ် ဝင်ခွင့်နည်း ဥပဒေ များနှင့်အညီ လျှောက်ထားနိုင်ကြောင်း ၎င်းက ရှင်းပြသည်။

လက်ရှိတွင် ရန်ကုန်အဝေးသင် တက္ကသိုလ် ၊ ဥပဒေ ပညာဌာန မှ Online ဖြင့် ဖွင့်လှစ်သင်ကြားသော ဘွဲ့လွန် ဥပဒေ ပညာ ဒီပလိုမာသင်တန်း (Post Graduate Diploma in Law) အောင်လက်မှတ်တင်ပြ၍ အထက်တန်းရှေ့နေနှင့် တရားလွှတ်တော် ရှေ့နေ အဖြစ် ဝင်ခွင့်လျှောက်ထားနိုင်ရန် အခွင့်အရေး ပေးထားပြီး ဖြစ်ကြောင်း ၎င်းက ဆိုသည်။

ယင်းအခြေအနေများကြောင့် အထက်တန်း ရှေ့နေ ၊ တရားလွှတ်တော် ရှေ့နေ စာမေးပွဲ များ ဖော်ဆောင်ပေးရန် အစီအစဉ် မလိုအပ်တော့ကြောင်း ဦးမြင့်အောင် က ထပ်လောင်းပြောကြားခဲ့သည်။

Credit : the voice