အမေရိကန်သမ္မတ ဒေါ်နယ်ထရမ့် ငယ်စဉ်က နေထိုင်ခဲ့တဲ့အိမ်မှာ တည်းခိုနေထိုင်လိုသူတွေအတွက် ငှားရမ်းနေထိုင်နိုင်ပြီဖြစ်တယ်လို့ ဒေးလီးမေးလ် သတင်းတပုဒ်မှာ ဖော်ပြပါတယ်။

အဲဒီနေအိမ်ဟာ နယူးယောက်မြို့၊ ကွင်းစ်ဆင်ခြေဖုံးဒေသမှာ တည်ရှိပြီး နေထိုင်လိုသူတွေအနေနဲ့ အဲဘီအန်ဘီ (Airbnb) အိမ်၊ ဟိုတယ် အခန်း အငှားဝန်ဆောင်မှု ကုမ္ပဏီမှတဆင့် ဆက်သွယ်စုံစမ်းနိုင်မှာ ဖြစ်ပါတယ်။

လက်ရှိမှာတော့ တညတာ တည်းခိုနေထိုင်ခွင့်ကို အမေရိကန်ဒေါ်လာ ၇၂၅ ဒေါ်လာ ကျသင့်မှာဖြစ်ပြီး သြဂုတ် ၁၁ ရက်နေ့ကစတင်ကာ နေထိုင်သွားနိုင်မယ်လို့ ကြေညာထားပါတယ်။

အိပ်ခန်း ၅ ခန်းပါဝင်တဲ့ အဲဒီနေအိမ်မှာ ထရမ့်ကို မွေးဖွားခဲ့ပြီး လေးနှစ်သားအရွယ်ထိ နေထိုင်ခဲ့တာ ဖြစ်ပါတယ်။

နေအိမ်မှာ ဒေါ်နယ်ထရမ့်ရဲ့ နာမည်ကြီးစာအုပ်တအုပ်ဖြစ်တဲ့ The Art of the Deal နဲ့ ထရမ့်ပုံစံတူ ဖြတ်ထုတ်ထားတဲ့ သက်ရှိလူတယောက် အရွယ်အစားရှိ ပုံတွေကို ဆင်ယင်ထားရှိတယ်လို့ ဆိုပါတယ်။

ဒီအိမ်ကို အိမ်ခြံမြေလုပ်ငန်းရှင် မိုက်ကယ်ဒေးဗစ်က ပြီးခဲ့တဲ့ ဒီဇင်ဘာလမှာ အမေရိကန်ဒေါ်လာ ၁ ဒသမ ၃၉ သန်းနဲ့ ဝယ်ယူခဲ့တာဖြစ်ပြီး သူ့ရဲ့ နောက်ထပ် စီးပွားရေး လုပ်ဖော်ကိုင်ဘက်တဦးကို အမေရိကန်ဒေါ်လာ ၂ ဒဿမ ၁၄ သန်းနဲ့ ပြန်ရောင်းချခဲ့ပါတယ်။

လက်ရှိမှာတော့ ဒီအိမ်ကို ဝန်ဆောင်မှုကုမ္ပဏီ အဲဘီအန်ဘီဆီ အပ်နှံပြီး ခုလို ငှားရမ်းဝန်ဆောင်မှုပေးဖို့ လုပ်ဆောင်လိုက်တာပါ။

“ဒေါ်နယ်ထရမ့်ကို ဒီအိမ်ထဲမှာ ၁၉၄၆ ခုနှစ်က ဖရက်ဒ်ထရမ့်နဲ့ မေရီထရမ့်တို့က မွေးဖွားခဲ့တယ်။ ပြီးတော့ ဒီအိမ်ကို ဂျမေကာအိမ်ခြံမြေလုပ်ငန်းဆီ ပြန်ရောင်းချခဲ့တယ်။ အိမ်ကိုတော့ ဖရက်ဒ်က ကိုယ်တိုင် ဒီဇိုင်းဆွဲ တည်ဆောက်ခဲ့တာ။ ထရမ့်ငယ်စဉ်က နေခဲ့တာနဲ့ ဘာမှမပြောင်းလဲသွားပါဘူး” လို့ ဝန်ဆောင်မှုကုမ္ပဏီက ဖော်ပြပါတယ်။

သမ္မတ ဒေါ်နယ်ထရမ့်ကတော့ “အဲဘီအန်ဘီရဲ့ ဆန်းသစ်တဲ့အမြင်ဟာ တချို့လူတွေအတွက် တကယ့်ကို ကြီးကျယ်နေမှာပါပဲ၊ ဒါပေမယ့် ကျနော်က ဒါကို မဖြစ်စေချင်ပါဘူး။ ဒါပေမယ့် တခါတရံမှာ ခင်ဗျားတို့အနေနဲ့ ဘယ်လောက်ပဲ မဖြစ်စေချင်တဲ့ အရာတွေ ဖြစ်နေပါစေ၊ လူတွေ နောက်ကွယ်မှာ ဘာတွေလုပ်နေမယ်ဆိုတာ မသိနိုင်ပါဘူး” လို့ ပြောပါတယ်။

Credit: DVB