ကျမ တို့ ပတ်ဝန်းကျင် တွင် တစ်ခါတရံ၌ အရက် နှင့်ပတ်သက်၍ ကွဲပြားခြားနားသော ထင်မြင်ချက်များကို ကြားရလေ့ရှိသည် ။တချို့က အရက် သောက်ခြင်း ကို လူမှုရေး ဟုခေါင်းစဉ်တပ်သည် ။ တချို့က သူငယ်ချင်း အချင်းချင်းအရက်သောက်၍စကားပြောဆိုခြင်း က ပို၍ရင်းနှီးချစ်ခင် အကျွမ်းတဝင်ဖြစ်စေသည်ဟုဆိုသည် ။ တစ်ခါတလေပါပဲ ဘာမှ မဖြစ်ပါဘူးဟုထင်မြင်တတ်ကြကာ ဆေးဖြစ်ဝါးဖြစ်ဟုပင် ခေါင်းစဉ်ကြီး ကြီးတပ်ကြသည် ။ အရက် လေး တစ်ခါတလေပဲသောက်တာ ကျန်တာအားလုံးကောင်းတဲ့ လူကောင်း တစ်ယောက်ပါဟုဆိုတတ်ကြသည် ။ သို့သော် ထို အရက် ကလေးကပင် ကျန်တာအားလုံးကို အကောင်းမှ အဆိုး သို့တဖြည်းဖြည်း ပြောင်းလဲသွားစေတာကို သတိမမူမိကြပေ ။
ဘာသာရေး ရှုထောင့်မှကြည့်လျှင် ..အရက် သောက်ခြင်း သည် ငါးပါးသီလ မှ တစ်ပါးကိုကျူးလွန်ခြင်းဖြစ်သည် ။ သို့သော် ထိုတစ်ပါးတည်းကပင် ကျန်လေးပါးကို ကျူးလွန်မိအောင် လှုံ့ဆော်ပေးနိုင်သည် ။
အရက်သည်လည်း စိတ် ကိုပြောင်းလဲစေနိုင်သော ယစ်ဆေးဝါး တစ်မျိုးဖြစ်သည် ။ အရက် ကြောင့် မူလစိတ်ပျောက်သောအခါ ခိုက်ရန်ဖြစ်ပွားပြီး လူသတ်မိသည့်အခါ ပါဏာတိပါတကံကို အလိုအလျှောက်ချိုးဖောက်မိပြီးသားဖြစ်မည် ။ မိန်းမကိစ္စကို ဝါသနာ မပါသည့်တိုင် ကြုံကြိုက်ပါကကျူးလွန်မိနိုင်မည် ။ စိတ်အခြေအနေ ပြောင်းကာ မိသားစုဝင် များကိုဖြစ်စေ မပြောသင့်တာပြောမိ မလုပ်သင့်တာလုပ်မိမည် ။ အရက် ၏ နောက်ဆက်တွဲပြသနာများကားပြော၍မကုန်နိုင်ပေ ။
သို့သော် ယနေ့ခေတ်တွင် လူတော်တော်များများသည် ရံဖန်ရံခါ အရက် သောက်ခြင်း ကိုပင် ခေတ်မှီသော ကိစ္စတစ်ခုဟုသတ်မှတ်ကာ မသောက်ဖို့တားမြစ်သူ ၊သူငယ်ချင်းများကသောက်၍ကိုယ်ကမသောက်လျှင်ပင် ခေတ်နောက်ကျ၍ ခေတ်မမှီအမြင်မကျယ်သူဟု ယူဆတတ်ကြပြန်သည် ။
အရက်သောက်ခြင်းကိုမနှစ်သက်သူသည် အရက် အကြောင်းကို ဥာဏ်မမှီသူမဟုတ် ၊ အရက် သောက်သူများကသာ အရက်ကိုလက်မခံနိုင်သူ၏ အတွေးအခေါ်စံချိန်စံနှုန်းကို ဥာဏ်မမှီနိုင်ခြင်းဖြစ်သည် ။
အမှန်တကယ်တော့ အရက်သောက်ခြင်းကြောင့်ဖြစ်ပွားတတ်သော ပြသနာ များသည် ..တိုက်ရိုက်ဖြစ်သည်မဟုတ်ဘဲ သွယ်ဝိုက်ဖြစ်ပွားကြသဖြင့်သာ အရက်ကို တိုက်ရိုက်စွပ်စွဲဖို့ခက်ခဲခြင်းဖြစ်သည် ။
အခါတစ်ပါးက ME ဘွဲ့ရ ပညာတတ် အရာရှိတစ်ယောက်သည် အရက် ကိုကြိုက်၍သောက်၏ ။ သူ့တွင် ထိုအရက်သောက်တာလေးသာ ရှိလျက်တခြားဘာမှအပြစ်မရှိ မိသားစုအပေါ် တာဝန်ကြေသော ယောကျာ်းကောင်း တစ်ယောက် ၊ မိန်းမနှင့်ကလေးများကို ချစ်တတ် အနွံတာခံတတ်သောယောကျာ်းတစ်ယောက်ဖြစ်သည် ။
ဇနီးဖြစ်သူ ကလည်း သူ့ရှေ့တွင်မသောက်ဖိုသာတားနိုင်ပီး ကွယ်ရာမှာမသောက်ဖို့မတားနိုင်ရှာချေ။သို့သော် .. နေပြည်တော်သို့ အစည်းအဝေးသွားသည့်အခါ အပေါင်းအသင်း များနှင့်အတူသောက်ပြီး တစ်ယောက်တည်းဆိုင်ကယ်နှင့်အပြန်တွင် မြောင်းထဲသို့ပြုတ်ကျကာ မနက်လင်းအားကြီးကျမှရဲကတွေ့သည့်အခါ အသက် မရှိရှာတော့ပေ ၊ ဘယ်လောက်နှမျောစရာကောင်းသနည်း ။ အရက်  နှင့်အသက်ကို လဲလှယ်ရရှာလေသည် ။
တစ်ခါတစ်ရံ၌တချို့သောအရက် ကြောင့်ဖြစ်သည့် ပြသနာ များသည် လူသိရှင်ကြားထွက်ပေါ်မလာတတ် ။ အရက်ကို အလွန်အမင်းကြိုက်သူသည် မိန်းမ အပေါ်စိတ်ဝင်စားမှာလျော့နည်းတတ်သဖြင့် .. ဇနီးမယား က  ထွက်ပေါက်ရှာသာယာမှုရှာသွားပြီး အိမ်ထောင် ပြိုကွဲရသည်များလည်းရှိတတ်ပြန်သည် ။
အရက်ကြိုက်သော ယောကျာ်း အများစုသည် .. ဒီတစ်ခုပဲလုပ်တာ ကျန်တဲ့ တာဝန် မပျက်ကွက်ဘူးဟု ကာဘာယူလေ့ရှိကြသည် ။ ယောကျာ်းတို့ပြုအပ်သည့် အဆင်တန်ဆာတစ်ခုဟုယူဆလိပ်ပြာလုံတတ်ပြသည် ။
သို့သော်မည်မျှပင် စည်းကမ်းတကျသောက်သည်ဖြစ်စေ.. ထိုသို့သောက်ခြင်းကြောင့် မိသားစုဝင် တစ်ဦးဦး စိတ်ဆင်းရဲပြီဆိုလျှင် ထိုသူသည် မိသားစုအပေါ်စိတ်ပိုင်းဆိုင်ရာ abuse လုပ်ခြင်းပင်ဖြစ်သည် ။
တစ်ခါတရံတွင် မိဘ ဖြစ်သူ၏ အရက်သောက်ခြင်းကို သားသမီးဖြစ်သူက မနှစ်မျို့သော်လည်းတားမြစ်ဖို့အားမတန်၍ ငုံ့ခံ နေရလျှင်လည်း သားသမီးအပေါ် စိတ်ပိုင်းဆိုင်ရာ abuse လုပ်ခြင်းဖြစ်သည် ။
အရက်သမားတချို့သည် မိသားစုအပေါ်တွင် ငါကနင်တို့ကို ဒါတွေ ဒါတွေ လုပ်ပေးထားတာ ဒါ့ကြောင့် ငါ အရက် သောက်တာတော့ နင်လက်ခံရမယ် ဆိုသည့် သဘောထားမျိုးနှင့် အကြပ်ကိုင်လေ့ရှိတတ်ကြသည် ။
မိသားစုလိုအပ်ချက်ကိုဖြည့်ဆည်းပေးထားသဖြင့် သူတို့ ၏ ပျော်ရွှင်မှု ကိုမပိတ်ပင်ရဟူသော သဘောထားမျိုးလည်းရှိတတ်ကြရာ မိသားစုဝင်များသည် ထိုလုပ်ရပ်ကို လက်ခံနိုင်သည်ဖြစ်စေ လက်မခံနိုင်သည်ဖြစ်စေ အောင့်အည်းသည်းခံကြရရှာသည် ။
ယခုအခါ တောအရပ်ဒေသတို့တွင် အရည်အသွေး မမှီသော အရက် များကိုသောက်သုံးရင်းအသက်တိုကြရရှာပြီ။ ဘဝများစွာ ပျက်ရရှာပြီ ။
သို့သော် မည်သို့ပင်ဖြစ်စေကာမူ အရက် ဆိုသောအရာကတော့ရောင်းကောင်းမြဲ ရောင်းကောင်းဆဲ ။
သောက်သူတွေကလည်းမက်မက်စက်စက်သောက်နေကြဆဲ။
အရက် သောက်ခြင်း အတွက် ဆင်ခြေအမျိုးမျိုးပေးနေကြဆဲ ။
သေသူတွေလည်း သေနေကြဆဲ ။
လူတို့ဆင်ခြင်တုန်တရား အားနည်းခြင်း ကို ရောင်းကောင်းလှသော အရက် များက သက်သေပြဆဲပင်ဖြစ်တော့သည် ။
ပုညခင်
share from : ငွေတာရီ

READ  ငွေ အရင်းအနှီး နည်းနည်းနဲ့လွယ်လွယ်ကူကူစနိုင်မယ့် စီးပွားရေး (၄)ခု

 

LEAVE A REPLY