ဘယ်လ်ဂျီယံနိုင်ငံသူ မော်ဒယ် တဦးဟာ ရှေးဟောင်း အီဂျစ်ဘုရားကျောင်းတခုတွင်းမှာ ကိုယ်လုံးတီးဓာတ်ပုံ ရိုက်ခဲ့တဲ့အတွက် ရိုက်နှက်ဖမ်းဆီး ချုပ်နှောင်ခံခဲ့ရပါတယ်။

မာရီဆာပါပန်ဟာ သြစတြေးလျ ဓာတ်ပုံဆရာတဦးဖြစ်တဲ့ ဂျက်ဆီ ဝေါ့လ်ကာနဲ့အတူ ရှေးဟောင်းဘုရားကျောင်းတွေထဲက တခုဖြစ်တဲ့ လပ်ခ်ဆော် (Luxor) မြို့တွင်းမှ ဘုရားကျောင်းထဲကို သက်ဆိုင်ရာရဲ့ ခွင့်ပြုချက် မတောင်းခံဘဲ ဝင်ရောက်ခဲ့ပြီး ကိုယ်လုံးတီးဓာတ်ပုံ အရိုက်ခံခဲ့တာပါ။

အဲဒီမော်ဒယ်ဟာ သူ့ကိုယ်သူ လွတ်လပ်တဲ့ စိတ်ဝိညာဉ်နဲ့ သဘာဝ အရိုင်းဆန်ဆန် ဖော်ထုတ်ပြသသူ အနုပညာရှင်တဦးအဖြစ် ဖော်ပြခဲ့ကာ နိုင်ငံပေါင်း ၅၀ လောက်မှာ ခုလို ကိုယ်လုံးတီး အနုပညာဖန်တီးမှု ဓာတ်ပုံတွေ ရိုက်ကူးခဲ့တယ်လို့ ဆိုပါတယ်။

ပါပန်က “သူတို့ကို ဒါဟာ အမြင့်မားဆုံး အနုပညာပြချက်တခုအဖြစ် လုပ်ဆောင်တာဖြစ်တယ်လို့ ရှင်းပြဖို့ ကျမတို့ ကြိုးစားခဲ့ကြပါတယ်။ ဒါပေမယ့် သူတို့က အနုပညာနဲ့ ကိုယ်လုံးတီးဖြစ်တည်မှု ဆက်နွယ်တာကို မမြင်ဘူးရှင့်။ သူတို့မျက်လုံးထဲမှာတော့ ဒါဟာ ညစ်ညမ်းမှုတခု၊ ဒါမှမဟုတ် တခုခုပေါ့ရှင်” လို့ ပြောပါတယ်။

သူတို့ ၂ ယောက်ဟာ လုံခြုံရေးတင်းကျပ်တဲ့ကြားက ခုလို ဓာတ်ပုံရိုက်ကူးဖို့ ကြိုးစားခဲ့ကြတာဖြစ်ပြီး ကင်းလှည့်အစောင့်တွေက ဖမ်းမိချိန်မှာတော့ ရဲစခန်းဆီ ရိုက်နှက် ခေါ်ဆောင်သွားခံခဲ့ရတာပါ။

သူတို့က ရဲတွေကို အလင်းအမှောင်စမ်းသပ်ဖို့ ကြိုးစားခဲ့တာသာဖြစ်တယ်လို့ ပြောခဲ့ကြပြီး ပုံတွေကို ဖျက်ခဲ့တာလို့ ဆိုပါတယ်။

ဒါပေမယ့် ရဲတွေက မယုံကြည်ဘဲ ကင်မရာထဲက အက်စ်ဒီကတ်ကို စစ်ဆေးခဲ့ချိန်မှာ ဘာတခုမှ မတွေ့ခဲ့ကြပါဘူး။

အဲဒီနောက်တော့ သူတို့ကို တာဝန်ရှိသူတွေက ခုလို ရှေးဟောင်းနယ်မြေတွင်းမှာ ရှက်စရာကောင်းတဲ့ အပြုအမူမျိုးမလုပ်ဖို့ သတိပေးခဲ့တာဖြစ်ပြီး ခံဝန်ကတိနဲ့ ပြန်လွှတ်ပေးခဲ့တယ်လို့ ဆိုပါတယ်။

ဒါပေမယ့် သူတို့ဟာ ဟိုတယ်ပြန်ရောက်ချိန်မှာ ရိုက်ကူးပြီး ဖျက်ခဲ့တဲ့ပုံတွေကို အဆင့်မြင့်ဆော့ဖ်ဝဲတမျိုး အသုံးပြုပြီး ပြန်လည်ရယူနိုင်ခဲ့တယ်လို့ ပြောပါတယ်။

ခုချိန်မှာတော့ မာရီဆာပါပန်ရဲ့ အီဂျစ်မှာ ရိုက်ကူးခဲ့တဲ့ ကိုယ်လုံးတီး အနုပညာပြကွက်တွေကို ပြသခွင့်ရခဲ့ပြီဖြစ်တယ်လို့ ဆိုပါတယ်။

Credit: DVB